Kita Ketemu ing Guritan
Dening: Sri Setya Rahayu
Kita ketemu ing taman guritan
Adhep-adhepan, pandeng pandengan
Nuli salaman
Esem sepisan ngemu pangajak
Ayo memitran
Dak-tampa tanganmu
Dak-wales esemmu
Ana kertas biru, mangsi biru
Dak-tulis edi, kanggomu
Matur nuwun, matur nuwun
Lawang-lawang wis padha menga
Lan banjur tuwuh crita-crita
Lang kembang-kembang katon mekar
Lan kupu-kupu katon bingar
Ngresepake
Emane, dinane lungse
Kita mlaku dhewe-dhewe ngemban gawe
Pepisahan ing pagering taman
Aja sedhih, aja sedhih, kok bisikke
Kita bakal ketemu maneh ing kene, ing taman kene
Bojonegoro, agustus 1973
(Dharma Nyata, No. 229, V,
Minggu ke I, Nopember 1975)
Kapethik saka buku
Guritan-Suripan Sadi Hutomo
Komentar
Posting Komentar