Langit

Langit

Dening KRISHNA MIHARDJA

Pangrasaku, kowe mung malengkung ing waliking gunung

Kadhangkala mung mumbul sakeng waliking grumbul

Nanging, dakluru datan ketemu

Tepak-tepak tumanceping sikilmu

Tilas agaris-garising panguwasanmu

Birumu cedhak ing panyawang adoh ing pangangah

Ing endi aku bisa nyenggol cahyamu

Aneng pucuking gunung pertapan

Aneng mustakaning sanggar pamujan

Aneng pucuking cecandhen

Apa aneng ati nalika sepi

Birumu kasat mripat nanging tan kena karegem ati

Kamangka waktu terus gingsir gumanti

Lan pati iku tekane mesthi

Banjur kapan aku bisa

Nyenggol cahyamu

Godean, akhir taun ‘92

PAGAGAN, No. 7, 18 April 1993